Lampard vill Crouch í landsliðið

Leikur Liverpool og Chelsea í Meistaradeildinni í gær var nokkuð stíft leikinn og mikið var um hörð návígi. Frank Lampard, miðjumaður Chelsea og lykilmaður í enska landsliðinu, gaf sér þó tíma til að hrósa landa sínum leggjalanga, Peter Crouch, og telur að hann ætti að eiga fast sæti í landsliði Englendinga. "Crouch gerir ákveðna hluti mjög vel. Öll lið hafa sína styrkleika og styrkur Liverpool felst ekki síst í því hve góður Crouch er í að taka á móti boltum og dreifa þeim til félaga sinna og hann gerði okkur lífið leitt allan leikinn í gær. Ég held að hann gæti komið með nýjar og sterkar víddir inn í enska landsliðið og ég er viss um að hann verður fastamaður í liðinu á næstu misserum," sagði Lampard.