Vetnisvagnaverkefnið framlengt?

Tveggja ára þróunarverkefni með vetnisstrætisvagna lýkur í lok ágúst en unnið er að því að lengja verkefnið um eitt ár. Eina Kárahnjúkavirkjun þarf til að framleiða megi nóg vetni fyrir alla bíla landsmanna og skipaflotann. Nýorka hefur séð um verkefnið með vetnisvagnana hér á landi og hefur safnað upplýsingum fyrir framleiðandann. Á sama tíma hafa safnast dýrmætar upplýsingar um vetnisstöðina að sögn framkvæmdastjóra íslenskrar Nýorku, Jóns Björns Skúlasonar. Aðspurður um hvað verði um vagnana þegar verkefninu með þá verði endanlega lokið segir Jón það óvíst - þeir fari hugsanlega á söfn. Þegar ný kynslóð vetnisvagna verður tilbúin, sem búist er við að verði í árslok 2007, verða vagnarnir sem nú eru notaðir úreltir. Jón Björn segir reynsluna af vögnunum vera mun betri en þeir bjuggust við þó þeir séu enn mun dýrari í rekstri en dísilvagnarnir. Viðhalds- og rekstarkostnaður þeirra er um 50 prósent hærra en á dísilvögnunum og fjárfestingakostnaður mun meiri en það. Tölurnar munu þó trúlega lækka töluvert með næstu kynslóð og bilið verði líklega alveg horfið með næstu kynslóð þar á eftir. Á árunum 2010 til 2012 er stefnt að því að vetnisvagnarnir verði samkeppnishæfir við þá dísilknúnu. Það sama gildi um bíla samkvæmt framtíðarsýn flestra fyrirtækja í þessum geira.   Spurður hversu orkufrek vetnisframleiðslan sé segir Jón Björn að útreikningar Nýorku geri ráð fyrir því að ef öllum bílum, strætisvögnum og fiskiskipaflota landsins yrði skipt út þyrfti álíka mikla raforku og Kárahnjúkavirkjun muni framleiða. Ákveðinn fjölda vetnisbíla þarf að fá til landsins til að grundvöllur sé fyrir því að reisa nýja vetnisstöð. Nýorka er í viðræðum við nánast alla bílaframleiðendur í heiminum til að fá vetnisbíla hingað í þróun áður en vetnisbílar verða komnir í almenna umferð en þeir búast við að það verði eftir um fimm til tíu ár.