Fjallagarpar á leið til Grænlands

Fjórir íslenskir fjallagarpar á fimmtugsaldri halda til Grænlands á morgun til að etja kappi við náttúruöflin og fjallagarpa af öðrum þjóðernum. Þeir telja engar líkur á sigri og voru í óða önn við að birgja sig upp af óhollustu. Fjórmenningarnir leggja af stað til Anmassalik á Grænlandi á morgun, þar sem ævintýrakeppnin Arctic Team Challenge fer fram. Þar munu þeir hlaupa, róa, hjóla og klifra í fjóra sólarhringa, leggja að baki 300 kílametra leið með samanlagðri hækkun upp á um 10 þúsund metra. Þeir segja álagið jafngilda því að hlaupa Laugaveginn, Landmannalaug Þórsmörk, einu sinni á dag, fjóra daga í röð. Matseðillinn í slíkri ferð virðist aðallega samanstanda af kolvetni, fitu og salti, en í nestispokann fara m.a. tvö kíló af súkkulaði, og annað eins af súkkulaði rúsínum og kartöfluflögum. Þeir telja sig vera að brenna tuttugu þúsund hitaeiningum á dag. Þeir ætla að brenna þessu í hamaganginum. Þeir segjast líka vera í fullu fæði og sukkmatinn sem þeir voru að versla ætla þeir að bera með sér þegar þeir eru að keppa. Íslenska liðið keppir við 8 önnur lið, frá Suður-Afríku, Bretlandi, Grænlandi og Danmörku. Til að eiga séns hafa þeir æft þrisvar á dag. Hafa hlaupið á morgnana og á kvöldin, lyft lóðum í hádeginum og auðvitað hoppað um á Esjunni. Svona mönnum nægir því einfaldlega ekki tveggja vikna ferð til Kanaríeyja eins og öðru fólki. Aðspurðir um sigulíkur hópsins segjast þeir telja litlar líkur á því að vinna keppnina þetta árið en líta frekar á hana sem góða æfingu fyrir næsta ár. Þeir vonast samt til þess að vera í þriðja til sjötta sæti.