Landspítali hyggst áfrýja

Ríkislögmaður ætlar að áfrýja dómi Héraðsdóms í máli Landspítalans og Þóru Fischer fæðingarlæknis. Spítalinn þarf samkvæmt héraðsdómi að greiða sjö og hálfa milljón króna í skaðabætur vegna stórfellds gáleysis sem olli dauða ungabarns. Foreldrar barnsins berjast enn fyrir því að lögreglan rannsaki málið. Legvatnsstunga sem Þóra Fischer gerði á móður barnsins vegna blóðflokkamisræmis varð til þess að taka þurfti barnið með keisaraskurði fjórum klukkustundum síðar en það var þá alvarlega veikt af blæðingalosti og lést nokkurum sólarhringum síðar. Eftirliti var ekki sinnt sem skyldi og Þegar komu fram klár merki um alvarlega fósturstreitu og grunur um blæðingarlost var seint og illa við því brugðist. Þetta leiddi til dauða barnsins og er í dómnum talið stórfellt gáleysi af fæðingalækninum. Ríkislögmaður segir allar líkur á því að dómnum verði áfrýjað enda hafi upphæð skaðabótanna komið mjög á óvart. Landspítalainn hafði áður viðurkennt einföld mistök og bótaskyldu í málinu, en stefnendur málsins vildu ekki una því. Enda töldu þeir líkt og dómurinn staðfestir að um stórfellt gáleysi hafi verið að ræða. Það er Landspítalinn sem greiðir skaðabæturnar. Helgi Magnús Hermannsson faðir barnsins sem lést segist ánægður með dóminn því að með honum séu mistökin viðurkennd. Helgi Magnús furðar sig á tregðu spítalans til að rannsaka málið og segir mikið lagt á þolendur mistaka sem þessara. Kröfu foreldranna um lögreglurannsókn hefur í tvígang verið vísað frá en hann segir að áfram verði barist fyrir rannsókninni og veltir jafnframt fyrir sér hvort að læknir sem hafi orðið uppvís að svona mistökum eigi að starfa áfram og vill þess vegna að þar til gerðir aðilar rannsaki það en reyni ekki að sópa yfir málið. Hann segir þau hjón fyrst og fremst vera að berjast fyrir rannsókninni svo að aðrir lendi ekki í sömu mistökum.