Kveikt á nýja gosbrunninum

Kveikt verður formlega á nýjum gosbrunni í Tjörninni í Hljómskálagarðinum á morgun. Ákveðið var að kaupa nýjan gosbrunn í Tjörnina til að lífga upp á borgarmyndina en gamli gosbrunnurinn, sem gefinn var af þáverandi sendiherra Bandaríkjanna skömmu fyrir 1980, var búinn að skila sínu og gott betur að sögn Þórólfs Jónssonar, garðyrkjustjóra. Stærð og staðsetning gamla gosbrunnsins gerði það að verkum að ef það blés aðeins fékk fólk á göngustígnum vestan Tjarnar vatnsúðann yfir sig við lítinn fögnuð. Nýi gosbrunnurinn var því hafður nokkuð minni og ráðstafanir gerðar til að auðvelda uppsetningu og niðurtekt.