Trygging ekki skilyrði fyrir láni

Tryggingamiðstöðin hefur afnumið þau skilyrði lánveitinga félagsins til ökutækjakaupa að þau skuli tryggð hjá félaginu. TM er þannig eina tryggingafélagið sem veitir lán til kaupa á ökutækjum og ekki gerir kröfu um að ökutækið sé tryggt hjá sama félagi. Áfram er skilyrt að ökutæki sem TM fjármagnar kaup á séu kaskótryggð og nægir staðfesting frá öðrum tryggingafélögum til að lán sé veitt. Í tilkynningu segir að TM veiti í dag hagstæðustu kjör á lánamarkaði til ökutækjakaupa. Vextir óverðtryggðra lána eru 9,5%, vextir verðtryggðra lána 6% og eru lántökugjöld felld niður til 1. ágúst í kynningarskyni. Meginreglan er að hámarkslán af þessu tagi séu 80% af kaupverði og fer lánshlutfallið stiglækkandi eftir aldri ökutækisins. „Við teljum að kjör TM í þessum tveimur megin þjónustuflokkum sem félagið býður – tryggingar og fjármögnun – séu samkeppnisfær hvor í sínu lagi. Við viljum að viðskiptavinir okkar geti valið um það hvort þeir eigi lánaviðskipti eða tryggingaviðskipti við félagið nema að hvort tveggja sé. Valkostur af þessu tagi hefur ekki tíðkast meðal tryggingafélaga sem bjóða þessa þjónustu,“ segir Björn Víglundsson, framkvæmdastjóri vátrygginga- og fjármálaþjónustu TM.