Milljónatjón á einkavirkjunum

Milljónatjón varð þegar stífla brast í Sandá í gærkvöldi. Eigendurnir, sem eru bændur í nágrenninu, eru ekki vissir um orsökina, en grunar að þurrkar undanfarinna daga hafi átt einhvern hlut að máli. Þeir þakka þó fyrir að enginn skyldi slasast þegar flóðbylgjan æddi niður árfarveginn. Laugarvatnið var ekki fagurt á að líta í dag, mórautt eins og jökulvatn eftir flóðbygljuna í gærkvöldi. Stíflurnar í Sandá eru tvær skammt fyrir ofan bæinn Eyvindartungu við Laugarvatn. Sú efri var gerð úr jarðvegi og þegar hún brast í gærkvöldi eftir gríðarmikla úrkomu æddi vatnið úr lóninu niður árfarveginn og stórskemmdi þá neðri sem er steinsteypt. Ein virkjun er við hvora stíflu og samtals hafa þær framleitt 600 kílóvött sem eigendurnir hafa selt inn á kerfi RARIK. En er vitað hversu mikið tjónið er? Þorkell Snæbjörnsson, einn eigendanna, segir að það sé ekki vitað en að hann geri ráð fyrir því að það hlaupi á milljónum. Það eigi eftir að skoða skemmdirnar og meta tjónið en ekki sé gott að gera það þegar allt er blautt og á floti. Aðspurður hvort aðstandendur virkjananna séu tryggðir segir hann að það haldi hann ekki. Þorkell segir hreinlega ekki vitað hvernig það gat gerst að efri stíflan brast en getgátur eru uppi um að miklir þurrkar hafi valdið því að brestur kom í hana. Fjölskyldan að Austurey 2 hefur lagt í miklar fjárfestingar með virkjununum og 600 kílóvatta framleiðsla hefur verið nokkur búbót. Þorkell segir stofnkostnað hafa verið mikinn en svo eigi virkjunin að virka og allt að ganga vel. Þorkell segist ekki vita hvenær verði hægt að ráðast í viðgerðir. Hann vonast til að hægt sé að koma neðri virkjuninni í gang eftir viku eða svo en lengri tíma muni taka að endurbyggja ofar í ánni. Krafturinn í vatninu var gríðarlegur og rör sem var hulið jarðvegi hefur nú skolast burt. Þorkell segir vissulega sárt að sjá á eftir mikilli uppbyggingu undanfarinna ára en það hefði þó getað farið verr. Hann þakki guði fyrir það að ekki hafi orðið slys á fólki, en það hafi verið töluvert af fólki á svæðinu í gær. Þá sé einnig gott að búfé hafi sloppið. Þorkell segir að skemmdirnar sé hægt að bæta en ef slys hefði orðið hefði það ekki verið gott mál. Bændur hafi lengi beðið eftir vætu en þetta hafi verið fullmikið af því góða.