Engin ástæða til álverskapphlaups

Næg orka og rými eru á Íslandi svo að Alcan þarf ekki að rjúka upp til handa og fóta þótt aðrir lýsi yfir áhuga á að byggja álver, segir Rannveig Rist, forstjóri álversins í Straumsvík. Engu að síður hraða skipulagsyfirvöld í Hafnarfirði afgreiðslu erindis sem varðar stækkun álversins. Norðurál skrifaði fyrir rúmum hálfum mánuði undir samkomulag sem kalla má viljayfirlýsingu um byggingu álvers í Helguvík. Norðlendingar vilja líka álver og Þorsteinn Hilmarsson, upplýsingafulltrúi Landsvirkjunar, sagði þá greinilegt að mikil samkeppni verði um orku í framtíðinni. Stækkun álversins í Straumsvík hefur verið í kortunum í nokkurn tíma en álverið framleiðir nú þó nokkru meira af áli en verksmiðjan er hönnuð fyrir. En þarf ekki Alcan að hraða ferlinu ef það á ekki að tapa í álkapphlaupinu? Rannveig Rist, forstjóri Alcans, segir að fleiri selji orku en Landsvirkjun þannig að möguleikarnir til að afla orku séu margir. Það þurfi að vega og meta vel ef það eigi að byggja álver eða stækka það sem fyrir er og það taki nokkurn tíma. Skipulags- og byggingaráð Hafnarfjarðar heldur aukafund á morgun þar sem erindi Alcan varðandi deiliskipulagsvinnu vegna fyrirhugaðrar stækkunar verður endanlega afgreitt. Að sögn Ellýjar Erlingsdóttur, eins ráðsmanna, er aukafundurinn ekki haldinn sérstaklega til að flýta fyrir afgreiðslu þessa máls heldur þurfi bara að grynnka á þeim fjölda mála sem fyrir liggi. Hún segir það frekar hafa dregist að afgreiða málið vegna þess að beðið hefur verið eftir umsögnum frá Umhverfisstofnun. En liggur ekki á að koma þessum málum á hreint, ef Alcan ætlar að vera fremst í röðinni? Rannveig segir að unnið hafi verið jafnt og þétt í málum á vegum Alcan. Fyrirtækið hafi ekki aukið hraðann en það þurfi að vinna að því af ýmsum öðrum ástæðum en stækkuninni að koma þessum málum á hreint. Alcan haldi sínu striki og setji ekki allt á annan endann bara af því að aðra langi til að byggja álver. Hún telji að það sé enn þá til pláss og orka í landinu af ýmsum toga.