Lög um stofnfrumurannsóknir vantar

Tekist hefur að búa til einstaklingsmiðaðar stofnfrumur sem þýðir að í framtíðinni gætu sjúklingar pantað sérsniða líffærahluta. Hér á landi hefur ekki farið fram stefnumótun um rannsóknir á stofnfrumum og sem stendur væri ólöglegt að fylgja rannsókn sem þessari eftir. Hópi vísindamanna í Suður-Kóreu hefur tekist að búa til klæðskerasniðnar stofnfrumur fyrir ellefu sjúklinga með því að taka frumkjarna úr sjúklingunum og setja þá í gjafaegg úr konum. Enn sem komið er hafa sjúklingarnir ekkert gagn af stofnfrumunum en vonast er til þess að í framtíðinni verði hægt að lækna sjúkdóma með þessu móti. Magnús K. Magnússon blóðmeinafræðingur segir að menn voni að stofnfrumulínur geti þróast og þroskast yfir í líffæri eða líffæravefi sem hægt verði að nota til lækninga í framtíðinni. Magnús segir alls ekki víst hvort eða hvenær verði hugsanlega hægt að þróa líffærahluta með þessu móti en í það séu að lágmarki fimm til tíu ár. Markmiðið núna sé að ná að breyta stofnfrumu yfir í þroskaða frumu sem í kjölfarið gæti svo nýst til lækninga á Parkinson-sjúkdómnum, sykursýki og eins til þess að laga skemmdir í mænu og taugum. Vandamálið við líffæraígræslur nú er að líkami fólks hafnar oft líffærum úr öðrum og þeir sem ganga í gegnum slíka aðgerð þurfa að vera á ónæmisbælandi lyfjum í mörg ár. Þetta vandamál yrði úr sögunni ef hægt væri að þróa líffæri úr erfðaefni sjúklingsins sjálfs. Hér á landi væri ekki hægt að vinna að rannsóknum sem þessum við óbreytta lagasetningu. Magnús segir að lagarammninn sé fyrst og fremst sniðinn að tækifrjógvunum en það átt sér stað umræða um þetta á þingi og lögð hafi verið fram þingsályktunartillaga sem taka hafi átt á þessum málum en ekki hafi náðst að afgreiða hana úr nefnd.