Íslensk rannsókn vekur athygli

Rannsókn íslenskra lækna á ýmsum aldursbundnum augnsjúkdómum hefur vakið athygli víða um heim. Meðal þess sem hún leiðir í ljós er samband milli hóflegrar neyslu áfengis og minni hættu á að fólk fái ákveðna skýmyndun á augasteini. Reykingar þrefalda hins vegar líkurnar á skýmyndun á augasteini og sama er að segja um vinnu úti undir beru lofti. Rannsóknin sem er þekkt undir nafninu Reykjavíkurrannsóknin var fyrst gerð árið 1996 að frumkvæði Alþjóðaheilbrigðismálastofnunarinnar í Genf. Friðbert Jónasson yfirlæknir á augnlækningadeild Landsspítala Háskólasjúkrahúss og prófessor við læknadeild Háskóla Íslands hefur stýrt rannsókninni í samvinnu við í samvinnu við prófessor K. Sasaki við augndeild háskólans í Uchinada í Japan. "Rannsóknin náði til upphaflega 1050 manns í Reykjavík 50 ára og eldri og var síðan endurtekin árið 2001 og náði þá til 846 einstaklinga úr upphaflega hópnum", segir Friðbert. Niðurstöður rannsóknarinnar hafa verið kynntar víða um heim á undanförnum árum með fyrirlestrum og blaðagreinum og hafa greinar til dæmis birst í öllum helstu læknatímaritum um augnsjúkdóma austan hafs og vestan. Rannsóknin náði til fjölmargra þátta, svo sem áhrif útfjólublárra geisla sólar, reykinga, áfengisneyslu, mataræðis og fleira. Hvað áfengisneysluna áhrærir segir Friðbert að svo virðist sem ekki skipti máli í hvaða formi áfengisins er neytt. "Þeir sem neyta áfengis í hófi, til dæmis eitt glas af víni þrisvar til fjórum sinnum í viku niður í tvisvar í mánuði, þeir eru í heldur minni áhættu á að fá ákveðið form af skýi á augastein en þeir sem aldrei neyta og þeir sem neyta meira áfengis", segir Friðbert. Hann segir lang líklegast að það séu andoxunaráhrif alkóhólsis sem hafi þessi áhrif.