Tilfinningalegt svigrúm við Múrinn

Forsetahjónin heimsóttu Kínamúrinn í morgun. Forsetinn þurfti sitt tilfinningalega svigrúm til að upplifa múrinn, eitt af sjö undrum veraldarinnar. Forsetafrúin virtist hins vegar haldin heimþrá. Eva Bergþóra er í Kína. Forsetahjónin voru ánægð með ferðina hingað að Kínamúrnum. Þetta var í fyrsta sinn Ólafur Ragnar heimsækir hann en Dorrit er þarna alvön, enda hefur hún mikla reynslu af Kína. Þegar hún var 23 ára, árið 1973, tók hún í þrjá mánuði þátt í uppgreftri leirhestsins fræga í Sían ásamt föður sínum. Dorrit hefur margoft heimsótt Kína frá þessum tíma en hún segir mikið hafa breyst frá því hún dvaldi hér fyrir 32 árum. Þá voru fáir bílar og flestir íbúar landsins klæddust svipuðum fötum í anda Maó formanns. Þá var heldur ekki búið að endurbyggja þann hluta Kínamúrsins sem hjónin heimsóttu í dag. Þegar forsetahjónin voru spurð hvað þeim væri efst í huga, standandi á Kínamúrnum, svaraði Dorrit því til að hún vildi frekar vera á Íslandi. Ólafur Ragnar sagði að þau þyrftu að fá tækifæri til að skynja staðinn og njóta hans, áður en þau myndu tjá sig um það. Hressandi ganga upp hið merkilega mannvirki varð forsetanum innblástur. Að henni lokinni sagði hann Íslendinga í rauninni unga þjóð í ljósi þeirrar sögu sem birtist þeim þarna. Kínverjar hefðu því mikið að miðla okkur. „Við getum nálgast þá af ákveðnu lítillæti. Við erum stolt af okkar sögu, teljum hana merkilega, en hún er í raun og veru ung samanborið við þá sem við sjáum hér,“ sagði Ólafur.