Grafa þarf úrganginn ómeðhöndlaðan

Grafa þarf nánast allan sláturúrgang ómeðhöndlaðan í jörð, þegar Kjötmjölsverksmiðjunni í Hraungerðishreppi verður lokað. Framkvæmdastjóri verksmiðjunnar segir þróunina vera bakslag sem ekki ætti að þekkjast hjá siðmenntuðum þjóðum. 60-70% af öllum sláturúrgangi hefur verið meðhöndlaður í verksmiðjunni síðustu ár. Á föstudaginn verður henni lokað og allti vinnslu hætt, án þess að aðrar lausnir séu fyrir hendi en urðun ómeðhöndlaðs sláturúrgangs. Fjórir munu missa vinnuna þegar verksmiðjunni verður lokað. Torfi Áskelsson, framkvæmdastjóri verksmiðjunnar, sem tekin var í notkun hausið 2000, segir að ekki verði annað við verksmiðjuhúsið að gera en að rífa það niður og selja til útlanda. Vilji sé hins vegar til að bíða í einn til tvo mánuði og sjá hvort stjórnvöld muni ekki bregaðst við svo hægt verði með einhverju móti að halda vinnslunni áfram. Ástæða lokunarinnar er að taprekstur hefurð verið á verksmiðjunni undanfarið, eða um 1-2 milljónir á mánuði. Að sögn Torfa hefur KB banki rekið verksmiðjuna og trúðu því og treystu að stjórnvöld kæmu til aðstoðar, en það brást. Eftir lokun verður sláturúrgangur grafinn ómeðhöndlaður í jörð. Aðspurður hvað sé til ráða segir Torfi að hægt væri að setja úrvinnslugjald á allar sláturafurðir, eða u.þ.b. 3 krónur á kílóið, sem færi svo í úrvinnslusjóð sem greitt yrði úr til verksmiðja eins og þessarar til að meðhöndla úrganginn eins og hjá siðmenntuðu fólki. Ýmsar stofnanir hafa gefið grænt ljós á moltugerð úr sláturúrgangi í Þykkvabænum og eru fyrirhugaðar framkvæmdir nú í grenndarkynningu hjá Heilbrigðiseftirliti Suðurlands. Hins vegar hefur verið bannað að nota kjötmjölið sem til verður í verksmiðjunni í nokkurn hlut. Úrgangurinn hefur þó verið urðaður eftir meðhöndlun síðustu tvö ár þar sem umfang hans minnkar um allt að 60% og smithættu hefur verið eytt með hitun upp í 140 gráður.