Fær hljóðlátustu farþegavél heims

Hin nýja Boeing 787 Dreamliner-þota, sem Icelandair hefur valið sem sína framtíðarvél, verður hljóðlátasta farþegaþota heims og mun auk þess geta notað Reykjavíkurflugvöll til flugtaks og lendinga. Icelandair tilkynnti nýlega um kaup á tveimur Dreamliner-þotum. Þessi tegund þykir marka upphaf nýrrar kynslóðar flugvéla en ólíkt öðrum farþegaþotum er hún ekki gerð úr málmi heldur plasti. Gert er ráð fyrir að hún fljúgi fyrst eftir tvö ár en Icelandair fær sínar vélar afhentar eftir fimm ár. Hjá Boeing hefur vélin fengið tölustafina 787 en hún verður sérlega umhverfisvæn, bæði sparneytin og hljóðlát. Á korti yfir það svæði sem verður fyrir 85 desibela hávaða í flugtaki sést að hávaðasvið Boeing 787 verður afar takamarkað miðað við hávaðasvið þeirra véla sem nú eru hljóðlátastar. Hilmar Baldursson, yfirflugstjóri Flugleiða, segir að vegna nýrrar tækni minnki hávaðasviðið verulega. Hávaði sem heyrist núna í töluverðri fjarlægð frá flugvöllum muni aðeins verða yfir flugbrautinni þegar nýja vélin fari í loftið. Þetta verði því hálfgert hvísl. Boeing 787 Dreamliner verður örlítið stærri en forveri hennar, Boeing 757. En mun hún einnig geta notað Reykjavíkurflugvöll? Hilmar segir að samkvæmt fyrstu upplýsingum um afkastagetu vélarinnar á flugbrautum myndi hún geta notað völlinn en áætlað sé að flugvellirnir á Akureyri og Egilsstöðum verði varaflugvellir hér á landi. Þótt Dreamliner-inn færi þannig létt með að nota Reykjavíkurflugvöll þannig að nánast enginn myndi heyra í henni eru þó engin áform um að færa millilandaflugið þangað. Hilmar segir að engum hafi dottið það í hug. Hann gegni þó og muni áfram gegna mikilvægu hlutverki sem varaflugvöllur. Heildarverðmæti Dreamliner-flugvélanna tveggja sem Icelandair hefur fest kaup á nemur um fimmtán milljörðum króna, en félagið á auk þess kauprétt að fimm slíkum vélum til viðbótar.