Stefna stjórnvalda kemur ekki fram

Stefna stjórnvalda um atvinnuréttindi til útlendinga kemur ekki fram í nýrri reglugerð um málefnið að mati Alþýðusambands Íslands. Halldór Grönvold, aðstoðarframkvæmdastjóri ASÍ, gagnrýnir að Vinnumálastofnun sé eftirlátið að túlka stefnu stjórnvalda á hverjum tíma. RÚV greindi frá þessu  ASÍ gerði verulegar athugasemdir við drög að reglugerðinni þegar hún var í smíðum í upphafi árs. Halldór segir að nú sé um allt annað skjal að ræða en þá. Tekið hafi verið á ýmsu sem Alþýðusambandið gagnrýndi, t.d. í tengslum við heimildir fyrirtækja til að flytja inn erlent starfsfólk án atvinnuleyfa. ASÍ gerir þó enn verulegar athugasemdir við reglugerðina. Sambandið bendir á að Vinnumálastofnun verði að fylgja því eftir að sömu reglur skuli gilda um útlendinga og Íslendinga varðandi starfsréttindi.   Í fréttum Stöðvar 2 í gær var greint frá því að um 40 íslensk fyrirtæki hafi frá áramótum tilkynnt um erlenda starfsmenn á sínum vegum, sem starfa á svokölluðum þjónustusamningum, án atvinnuleyfis. Gissur Pétursson, forstjóri Vinnumálastofnunar, segir fæsta uppfylla skilyrði og hvetur fyrirtæki til að sækja einfaldlega um atvinnuleyfi í stað þess að reyna svona krókaleiðir.