Veikleikar í svæðisvörn Keflavíkur

"Hittnin var hroðaleg í síðasta leik og allir lykilmenn liðsins voru að hitta miklu verr en þeir eru vanir og það má ekki gerast aftur," sagði Hlynur Bæringsson fyrirliði Snæfells sem tekur á móti Keflavík í öðrum leik úrslitanna um Íslandsmeistaratitil karla í körfubolta í íþróttahúsinu í Stykkishólmi í kvöld. Keflavík vann fyrsta leikinn með 15 stigum og getur komist í 2-0 með sigri í Hólminum í kvöld en það er ekki á dagskránni hjá Hlyni og félögum hans í Snæfelli sem höfðu fyrir tapið í Keflavík á föstudaginn unnið fimm leiki í röð í úrslitakeppninni. Nú er komið að þeim að reyna stoppa sigurgöngu Keflvíkinga en Keflavík hefur nú unnið fjóra leiki í röð og haldið mótherjum sínum undir 80 stigum í þeim öllum. "Það verður alveg stappað í húsinu í kvöld og svaka stemmning og við verðum bara að mæta til leiks og taka á þessu. Við verðum að vinna báða heimaleikina í þessari seríu ef við ætlum að eiga möguleika. Síðan fáum við þrjú tækifæri til þess að vinna í Keflavík. Þessi lið eru mjög jöfn en samt mjög ólík. Úrslit leikjanna fara algjörlega eftir því hvernig stíll er spilaður. Ef leikurinn fer fram á hálfum velli þá komum við til með að vinna flesta leikina en ef leikurinn fer fram á öllum vellinum og verður í kjölfarið miklu hraðari þá vinna þeir alla. Þetta snýst bara um það hvort liðið nær að stjórna hraðanum og spila sinn leikstíl," segir Hlynur sem veit um veikleika í hinni frábæru vörn Keflvíkinga sem hefur leikið mörg lið svo grátt að undanförnu. "Þeir spila svæðisvörnina þannig að þeir vilja ekki gefa neitt inni í teig því það er svo mikill stærðarmunur á þessum liðum. Við getum ekki leyft þeim það og þurfum að sækja meira inn í teig. Aðalástæðan fyrir því að þeir spila pressuvörn og svæðisvörn er að þeir vilja ekki að við séum inni í teignum. Það er fullt af veikleikum í þessarri svæðisvörn, það er til dæmis aldrei stigið út og því er auðvelt að taka sóknarfráköst. Við vitum af þessum veikleikum og þurfum bara að nýta okkur þá eins og við getum," sagði Hlynur í samtali við Fréttablaðið í gær. Leikurinn hefst klukkan 19.00.