Tíkin tuggði tölvukubb

Litlu mátti muna að páskafrí Vigdísar Esradóttur, forstöðumanns Salarins í Kópavogi, færi í hundana þegar tíkin Una tuggði frá henni tölvukubb með mikilvægum gögnum miðvikudaginn fyrir páska. "Hún náði í kubbinn og tuggði vel og vandlega áður en ég náði honum af henni. Ég reyndi að stinga kubbnum í tölvuna en allt kom fyrir ekki, svo ég þurfti í flýti að skrifa bréf til áskrifenda minna sem átti að fara í póst fyrir páska. Þar að auki sá ég að ég þyrfti að vinna heilan dag í páskafríinu." Vigdís mætti kvefuð og þungbúin til vinnu annan dag í páskum og kunni Unu sinni litlar þakkir, þegar upptökumaðurinn Sveinn kom aðvífandi til bjargar. "Sveinn bauðst til að kíkja á kubbinn, sem var til allrar hamingju enn í ruslafötunni, og sá að lóðningnuna vantaði á hann. Hann bauðst til að reyna að laga kubbinn og viti menn, hann virkar!" segir Vigdís og greinilegt að þungu fargi er af henni létt. "Ég sé fram á að þurfa að vinna í fimmtán mínútur í staðinn fyrir fimm klukkustundir eins og stóð til, og fæ því dálítið páskafrí." Vigdís segist hafa hugsað Unu þegjandi þörfina þegar hún gæddi sér á á kubbnum. "Ég ætla ekki að segja þér orðin sem voru látin fjúka í hita augnabliksins. En ég er löngu búin að fyrirgefa henni enda er hún unaðsleg," segir Vigdís um Unu, sem var ekki neitað um páskasteikina þrátt fyrir uppátækið.