Lóðin a.m.k. fimm milljarða virði

Lóðin í Öskjuhlíð sem Reykjavíkurborg hefur boðið Háskólanum í Reykjavík er að minnsta kosti fimm milljarða króna virði. 20-30 þúsund manns gætu starfað í Vatnsmýrinni á næstu árum þegar nýtt þekkingarþorp verður að veruleika. Lóðin sem Háskólanum í Reykjavík stendur til boða í Öskjuhlíð er um tuttugu hektarar og er talin a.m.k. fimm milljarða króna virði. Hluti lóðarinnar liggur innan flugvallargirðingar þar sem áður var gert ráð fyrir nýrri samgöngumiðstöð en samkvæmt samkomulagi borgarinnar og samgönguráðherra hefur hún nú færst norðar. Líkt og Háskóli Íslands fær skólinn lóðina án endurgreiðslu en greiðir þá eingöngu gatnagerðargjöld. Um fimm þúsund nemendur stunda nám við skólann í dag eftir að hann var sameinaður Tækniháskólanum en lóðin sem er gríðarlega stór að að rúma alla starfsemi skólans á næstu árum. Þar með hátæknifyrirtæki í rannsóknarsamstarfi og stúdentagarða. Skólanum stendur einnig til boða lóð í Garðabæ en stjórnendur hans hafa tekið sér frest fram í miðjan aprílmánuð til að ákveða hvaða tilboði þeir taka. Bakvið Öskju og Íslenska erfðagreiningu hefur Háskóli Íslands skipulagt vísindagarða sem telja um fimmtíu þúsund fermetra. Visindagarðarnir eru hugsaðir sem aðsetur þróunar- og rannsóknardeilda hátæknifyrirtækja. Undirbúningur er kominn vel á veg og áætlað að framkvæmdir geti hafist fljótlega. Áformað er að stækka Landspítalann um 180 þúsund fermetra á lóðinni við Hringbraut. Þar af verður byggt yfir rannsóknar og líftæknistarfsemi þar sem Umferðarmiðstöðin stendur núna. Þetta verður uppistaðan í þekkingarþorpinu sem á að reisa á þessu svæði, frá Vatnsmýrinni að Öskjuhlíð, en þar munu starfa að jafnaði 25-30 þúsund manns á hverjum degi, ef Háskólinn í Reykjavík verður með. Ljóst er að allar þessar framkvæmdir til viðbótar við nýja samgöngumiðstöð kalla á öflugar ráðstafanir í umferðarmálum. Svokallaður Hlíðarfótur er inni á samgönguáætlun en sá vegur á að liggja frá Hringbraut og að Samgöngumiðstöð. Þá eru Öskjuhlíðargöng inni á langtímaáætlun, neðanjarðargöng frá Hlíðarfæti, undir Öskjuhlíðina að Kringlumýrarbraut. Framtíð Samgöngumiðstöðvarinnar veltur á því að göngin verði að veruleika en þau eru háð umhverfismati. Framtíðarstaðsetning Háskólans í Reykjavík er hins vegar ekki háð göngunum þótt þau myndu gera staðsetninguna enn eftirsóknarverðari. Borgaryfirvöld vonast til að samstarf ólíkra skóla, hátæknifyrirtækja og rannsóknarstofnana á svæðinu geri Vatnsmýrinni kleift að keppa við öflugustu háskóla- og hátæknisvæði í heimi. Sú framtíðarsýn skýrir kappið sem borgaryfirvöld leggja á að greiða götu þessarar uppbyggingar.