Hrósar ekki sigri vegna dóms

Íslenskur friðargæsluliði sem særðist í sjálfsmorðsárásinni á Kjúklingastræti í Kabúl í Afganistan segist ekki hrósa sigri vegna dóms yfir þeim fjórum mönnum sem skipulögðu árásina. Mennirnir hlutu allir dauðadóm. Sérstakur öryggisdómstóll í Kabúl dæmdi í vikunni fjóra menn til dauða fyrir að hafa skipulagt tvær árásir. Eina sem varð bandarískum hermanni að bana og síðan sjálfsmorðsárás 23. október á síðasta ári í Kjúklingastræti, einni aðalverslunargötunni í Kabúl. Tveir dóu auk árásarmannsins, bandarísk kona á þrítugsaldri og 13 ára afgönsk stúlka, og þrír íslenskir friðargæsluliðar særðust, þeir Stefán Gunnarsson, Steinar Örn Magnússon og Sverrir Haukur Grönli, sem voru staddir með tveimur öðrum Íslendingum í teppakaupaleiðangri fyrir yfirmann sinn, Hallgrím Sigurðsson. Sverrir Haukur segir að þessi dauðadómur hreyfi ekki mikið við sér. Hann hafi aldrei persónugert árásina og hatist ekki út í einn né neinn. Hann sé sigri hrósandi yfir því að mennirinir hafi fengið réttmæta meðferð. Hann ætli ekki segja hvort það sé rétt eða rangt að dæma þá til dauða. Réttarkerfið og menningin í Afganistan sé bara þannig. Því meira sem hann hafi reynt að kynna sér Afgana því minna hafi hann skilið í menningu þeirra. Þetta séu alls ekki fordómar en Ísland og Afgansitan sé bara gjörólíkir menningarheimar. Árásarmaðurinn hét Mohammed Akbar og samkvæmt dómskjölum tók hann að sér að fremja þessa árás eftir að annar maður sem upphaflega hafði verið valinn til verksins neitaði. Akbar klæddi sig eins og betlari, batt sex handsprengjur um sig miðjan og náði að sprengja þrjár þeirra. Sverrir Haukur segir um þessar upplýsingar að enn og aftur hugsi hann um hversu heppnir Íslendingarnir séu að vera á lífi. Þeir fjórir sem nú hafa verið dæmdir til dauða fyrir verknaðinn eru taldir hafa tengsl bæði við fyrrverandi talibanastjórn Afganistans sem og al-Qaida hryðjuverkasamtök Osama bin Ladens. Enn er þó óljóst hvort þeir störfuðu sjálfstætt eða tóku við skipunum frá einhverjum öðrum. Þrír þessara manna eru Afganar en einn, maður að nafni Haidar, kemur frá Tadsjikistan og er talinn vera höfuðpaurinn. Mennirnir geta áfrýjað dómnum.