Margrét Sverrisdóttir ber af

Matthías Bjarnason, fyrrverandi ráðherra, var í hópi fundarmanna á flokksþingi Frjálslynda flokksins á Kaffi Reykjavík um síðustu helgi. Matthías hefur verið í flokknum svo að segja frá stofnun hans og skipaði meðal annars heiðurssætið í Norðvesturkjördæmi í síðustu kosningum. "Þetta var ágætur fundur. Flokkurinn er vaxandi og ég er bjartsýnn á framtíðina. Ég tel að hann eigi fullt erindi og það gæti vel farið svo að hann kæmist í oddaaðstöðu eftir næstu kosningar," segir Matthías. Hann sat á þingi fyrir Sjálfstæðisflokkinn í 32 ár og var ráðherra í átta ár. Hann fylgdi svo félaga sínum, Sverri Hermannssyni, þegar hann stofnaði Frjálslynda flokkinn í aðdraganda kosninganna 1999. Matthíasi líst vel á forystu flokksins en hún var endurkjörin eftir snörp átök um varaformannsembættið. "Það er margt gott fólk þarna en Margrét Sverrisdóttir ber samt af," segir hann. Á flokksþinginu upplýsti Guðjón Arnar Kristjánsson formaður að Matthías og Sverrir Hermannsson væru honum til ráðgjafar í störfum stjórnarskrárnefndar sem hann situr í fyrir hönd flokksins. Matthías segir það rétt að því marki að hann hafi upplýst Guðjón Arnar um störf stjórnarskrárnefndarinnar sem hann sjálfur sat í um og upp úr 1980. "Þá var lítið gert með störf nefndarinnar. Við unnum ágætis vinnu en þeir sem réðu, forvígismenn stjórnarflokkanna, gerðu ekkert með tillögur okkar." 57 ár eru liðin síðan Matthías sat fyrst ámóta fund hjá stjórnmálaflokki, það var landsfundur Sjálfstæðisflokksins 1948 en þá var Ólafur Thors formaður. "Það er langt síðan. Svona er það þegar menn lifa jafn andskoti lengi og ég," segir Matthías og glottir en hann er á áttugasta og fjórða ári. Og að sögn við ágæta heilsu með bæði sjón og heyrn í góðu lagi.