Segir sönnunarbyrði óeðlilega

Klúður í rannsókn lögreglu varð til þess að maður, sem sakaður var um manndrápstilraun var sýknaður í dag. Óeðlileg sönnunarbyrði, segir varalögreglustjóri. Í júní á síðasta ári ók leigubílstjóri fjórum mönnum um borgina þegar einn þeirra réðst á hann og skar hann á háls. Leigubílstjórinn slapp lifandi en litlu mátti muna. Einn mannanna var handtekinn og ákærður fyrir tilraun til manndráps en var í dag sýknaður í Héraðsdómi Reykjavíkur. Ástæðurnar eru þær að sakborningurinn mundi ekkert sökum ölvunar, leigubílstjórinn sá ekki hver réðst á hann og rannsókn lögreglu var að mati héraðsdóms svo ábótavant að ekki var hægt að sakfella manninn gegn neitun hans. Segir í dómnum að þær rannsóknir, sem hefði átt að gera í tengslum við málið, hafi ekki verið gerðar, en að þær hefðu getað haft áhrif á niðurstöðuna. Ingimundur Einarsson, varalögreglustjóri í Reykjavík, segir að gagnrýni dómaranna verði tekin til skoðunar en hann heldur því einnig fram að sönnunabyrðin sé alltof mikil og reyndar farið fram úr því sem eðlilegt geti talist eða það sem skynsemin segi mönnum yfirleitt þegar komið sé á vettvang. En er þá allt í lagi með rannsóknina sem fram fór? Ingimundur segir að vissulega sé hægt að finna að rannsókn málsins í einhverjum atriðum þegar grannt sé skoðað en að þær ávirðingar sem meirihluti dómsins hafi fundið skuli vega svona þungt sem raun ber vitni og leiði sýknu sakbornings þyki honum miður, Guðbjarni Eggertsson, lögmaður leigubílstjórans, segir að í ljósi rannsóknarinnar hafi mátt búast við þessari niðurstöðu. Leigubílstjórinn vildi ekki koma í viðtal en sagðist ósáttur við niðurstöðuna. Hann væri með svakalega áverka, líkamlegra sem andlegra, sem enginn svaraði til saka fyrir. Guðbjarni taldi víst að málinu yrði áfrýjað.