Beint frá bóndanum

Í gær kynnti Guðni Ágústsson landbúnaðarráðherra skýrslu nefndar sem fjallað hefur um heimasölu afurða bænda, en hann telur það afar nauðsynlegt að bændur geti í vaxandi mæli selt afurðir sínar beint frá búum sínum og vill að vinna verði lögð í það af krafti. Nefndin sem kynnti sér meðal annars aðstæður í Noregi ,þar sem rík hefð er fyrir sölu landbúnaðarafurða beint frá bóndanum, segir í skýrslu sinni að þó lítið sé því til fyrirstöðu í dag að bændur geti hafið heimasölu á afurður sínum með tilskyldum leyfum, séu reglur varðandi slíka sölu óþarflega flóknar og íþyngjandi fyrir bændur. Mikilvægt þykir að smíða lög og reglur sem henta sérstaklega þeim sem selja afurðir sínar beint af búinu og jafnvel breyta núgildandi reglum. Þá kemur fram í skýrslu nefndarinnar að kannaður verði grundvöllur á tilslökun á kröfu um gerilsneyðingu á mjólk þegar um milliliðalausa sölu er að ræða, sem geri fólki kleift að kaupa nýja ógerilsneydda mjólk beint af bóndanum. Jafnfram að stjórnvöld og bændur leiti samninga um að ákveðinn hluti mjólkuframleiðslu verði heimilaður til nota í heimavinnslu. Í skýrslu nefndarinnar þar sem bæði eru lagðar fram tillögur bæði ætlaðar bændum og ríkisvaldinu og er meðal annars lagt til að ferðaþjónustubændur og aðrir bændur efli með sér samtök. Rík áhersla er lögð á að heimasala bænda verði gerð með ferðaþjónustu í huga og þar sem alþjóðavæðing hefur kallað á aukna eftirspurn eftir mat með séreinkennum landa og svæða. Með þessu breytingum er verið að breyta talsvert landslagi landbúnaðar og ferðaþjónustu á Íslandi og mun það auka möguleikanna á mikilli vöruþróun, auk samkeppni á markaði þó hér sé ekki verið að ræða um vörur sem seldar verða til stórverslanna.