Blóðbankinn hefur útrás

Blóðbankinn hefur hafið útrás, líkt og aðrir íslenskir bankar. Bankinn er byrjaður að skrá sjálfboðaliða í beinmergsgjafaskrá sem verður hluti af norsku beinmergsgjafaskránni. Alþjóðlegt samstarf skiptir sköpum, segir yfirlæknir Blóðbankans. Undirbúningur að stofnun íslensku stofnfrumugjafaskrárinnar, eða beinmergsgjafaskrár, hefur tekið fimm ár. Sjálfboðaliðum verður safnað í skrána hér á landi og upplýsingar sendar til norsku beinmergsgjafaskrárinnar, en hún er hluti af alþjóðlegu samstarfi þar sem meira en níu milljónir stofnfrumugjafa eru á skrá. Stefnt er að því að skrá 500 sjálfboðaliða á þessu ári og 2.500 á næstu fimm árum. Blóðbankinn hefur hingað til sinnt svokallaðri vefjaflokkun í tengslum við ígræðslu líffæra og stofnfrumna en sjúklingar sem þurfa á stofnfrumum að halda eru oftast með illkynja blóðsjúkdóma eða æxli. Virkir blóðgjafar geta orðið stofnfrumu- eða beinmergsgjafar á Íslandi en með stofnun beinmergsgjafaskrárinnar aukast einnig líkurnar á að sjúklingur hér á landi geti fengið stofnfrumur utan úr heimi. Sveinn Guðmundsson, yfirlæknir Blóðbankans, segir að það skipti Íslendinga máli að vera þátttakendur í alþjóðlegu samstarfi og Blóðbankinn líti á þetta sem útrás hans á alþjóðlegan markað. Útrás einkenni íslenskt þjóðfélag í dag og Blóðbankinn sé þátttakandi í henni. Torstein Egeland hjá Ónæmisstofnun norska ríkisspítalans segir að hér á landi séu vefjaflokkar sem nauðsynlegt sé að hafa með í þessu alþjóðlega samstarfi því það séu sjúklingar annars staðar á Norðurlöndum eða í Bandaríkjunum sem þurfi á þeim að halda. Íslenskir sjúklingar njóti þess að fá stofnfrumur utan úr heimi og því sé rétt að vera með og bjóða sjúklingum um allan heim stofnfrumur héðan.