Kylfusveinn Vijay Singh ósáttur

Það er ekki tekið út með sældinni að vera kylfusveinn hjá einum besta golfara heimsins. Þetta fullyrðir Dave Renwick sem hefur starfað sem kylfusveinn hjá Fiji-búanum Vijay Singh, sem er í efsta sæti heimslistans um þessar mundir. Renwick, sem er skoskur, er sagður hafa fengið 1 milljón dollara í laun á síðasta ári eða rúmlega 63 milljónir íslenskra króna. "Við erum ennþá ágætis vinir en þetta var enginn dans á rósum, þrátt fyrir að launin væru góð," sagði Renwick. "Eftir að metnaður Vijay jókst varð hann mjög harður húsbóndi. Þegar ég vaknaði á morgnana var ég mjög langt frá því að vera fullur tilhlökkunar að fara í vinnuna."