Frumkvöðull á meðal langtímafanga

Kvenfangi á fimmtugsaldri, sem afplánar dóm fyrir manndráp, var settur fyrirvaralaust í einangrun á Litla Hrauni á miðvikudag. Fanginn, sem hefur dvalið í kvennafangelsinu í Kópavogi, hefur ekki fengið aðrar skýringar á flutningnum en þær að hugmyndir séu uppi um að vista konur sem afplána langa dóma í auknum mæli fyrir austan. Samkvæmt upplýsingum frá systur konunnar hafa ekki fengist nein svör við því hversu lengi þetta ástand kemur til með að vara en sagt að stefnt sé að því að byggð verði sérstök álma fyrir kvenfanga á Litla-Hrauni í framtíðinni. Systir hennar segir dvölina á Hrauninu hafa verið kynnta fyrir fanganum með þeim orðum að hún væri „frumkvöðull“ í málefnum langtímafanga þar sem innan skamms myndu bæði kynin geta afplánað á Litla-Hrauni. Frumkvöðullinn nýtur hins vegar ekki sömu réttinda og karlfangar - er eins og áður sagði í einangrun í þröngum klefa á nóttunni sem ekki hefur snyrtiaðstöðu né fataskáp, og er að mestu án samneytis við aðra fanga á daginn. Systir hennar segir hana stríða við geðhvarfasjúkdóm og fíkniefnavanda og þrátt fyrir góðan vilja yfirvalda, sem hafi vistað hana um tíma á Sogni og í Hegningarhúsinu við Skólavörðustíg, hafi ekki fundist framtíðarlausn á vandanum. Einangrunarvist án skýringa sé hins vegar ekki lausn. Guðmundur Gíslason, forstöðumaður Kvennafangelsisins, segir að Fangelsismálastofnun hafi ákveðið flutninginn en ekki skýrt frá því hvort þetta yrði til frambúðar eða ekki. Það hafi verið lengi til umræðu að fangelsið væri of þröngt fyrir langtímavistun og frekari tækifæri væru á Litla-Hrauni. Konur hafi áður verið fluttar þangað, eigi þær langa fangavist fyrir höndum og erfiðleikar hafi verið uppi í samskiptum við aðra fanga. Hann tjái sig ekki um mál einstakra fanga en honum vitanlega hafi viðkomandi kona ekki verið flutt milli fangelsa vegna þess að hún hafi brotið af sér. Ekki náðist í forsvarsmenn Fangelsismálastofnunar vegna málsins í dag.