Fögnuðu próflokum uppi í sveit

Víða mátti sjá rútur fullar af unglingum á leið upp í sveit til að fagna því að samræmdum prófum lauk í dag. Skólayfirvöld, foreldrar og lögregla gera allt sem í þeirra valdi stendur til að koma í veg fyrir að tíundu bekkingar sameinist í drykkju að prófum loknum. 111 nemendur í Árbæjarskóla fóru í dag á Snæfellsnes þar sem þau verða fram á föstudag til að fagna lokum samræmdu prófanna. Þá fóru hátt í 600 nemendur víðs vegar af landinu að bökkum Hvítár þar sem meðal annars var farið í klifur og flúðasiglingar. En hvernig gengu prófin? Björn Orri Hermannsson, nemandi í Árbæjarskóla, segir að sér hafi gengið ágætlega en honum hefði mátt ganga betur. Aðspurður hvort hann hafi valið sér framhaldsskóla segir Björn að hann sé að flytja til útlanda og þar fari hann í skóla. Magnea J. Ólafsdóttir, sem einnig er í Árbæjarskóla, segir að sér hafi einnig gengið ágætlega. Aðspurð hvort hún telji að hún nái öllum prófunum segir Magnea að það komi í ljós. Allir umsjónakennarar í tíundu bekkjunum í Árbæjarskóla fara með nemendum sínum í ferðina og eru ekki síður spenntir en nemendurnir. En er hreinlega verið að forða krökkunum úr borginni? Ásta Benediktsdóttir, kennari í Árbæjarskóla, segir að sú umræða hafi komið upp fyrir nokkrum árum að fara með krakkana úr borginni vegna ýmissa hátíða við próflok en Árbæjarskóli hafi gert þetta í mörg ár og þar þekki menn ekkert annað. Hún hafi farið 15 ár í röð en markmiðið sé að krakkarnir skemmti sér á heilbrigðan hátt í náttúrunni. Nokkrir tíundubekkingar sem Stöð2 ræddi við ætla þó aðeins fresta drykkjuskemmtunum fram yfir skipulagðar ferðir og horfa hýru auga til helgarinnar.