Mjúkar aðferðir skila meiru

Karlveldi og hestar - Ása Óðinsdóttir Ég las hestapistil Jens Einarssonar þriðjudaginn 29. mars og eins og nafnið gefur til kynna vænti ég þess að pistillinn fjallaði um hesta. En ég þurfti ekki að lesa meira en fyrstu setninguna til þess að gera mér ljóst að ég fengi ekki mikla hestamennsku með morgunkaffinu þennan daginn. Hér var til umræðu hrun hins íslenska karlaveldis á kostnað hestsins. Ég renndi þó í gegn um pistilinn og kjálkarnir sigu æ neðar eftir því sem lengra leið á þessi sorglegu skrif. Ég var satt að segja alltaf að bíða eftir punktinum með pistlinum, sem svo kom aldrei. Ég býst svo sem ekki við að sjónarmiði Jens verði breytt, enda væri það tímasóun að ætla sér það. Hins vegar efast ég stórlega um að þessi karlaútrýming úr samfélaginu sé mjög raunveruleg. Málið er bara það eins og allir vita, eða ættu að vita, að það skilar litlum tekjum í heimiliskassann að skeina rassa og skúra gólf heima eða heiman, jafnvel þó að það sé ekki síður mikilvægt en að byggja hús eða keyra lyftara. Svo virðist líka sem konur séu líka fullfærar um að skila sómasamlega af sér öllu því sem karlar hafa gert í gegn um tíðina, jafnvel að míga uppréttar. Hvað hestamennsku og tamningar varðar, hefur það sýnt sig að þessar "mjúkramanna, grænu aðferðir" skila miklu betri árangri en þessar tamningaraðferðir sem minnst var á í pistlinum góða, þessar sem sýndu manndóm og stórhug karlmanna. Og ef grannt er skoðað er þetta í raun sama lögmál og gildir í tamningu mannfólks, það er varla hægt að búast við að barið barn verði nokkru sinni að manni. Eins og fram kom framar í þessum texta mínum náði ég ekki punktinum með skrifum pistilhöfundar. Fljótt á litið virtist þetta vera óður til karlmanna um að gæta sín á valkyrjum þeim sem hafa það eitt að markmiði að bola þeim út úr samfélaginu, skella á þá uppþvottahönskum og læsa þá inni í eldhúsi. En þegar allt kom til alls fannst mér þetta snúast upp í andhverfu sína og verða niðurlægjandi fyrir karlþjóðina. Með þessum texta sínum fannst mér pistilhöfundur gera karlmenn að einhverjum greyjum sem óréttlæti heimsins og "testósterónóverdósaðar" breddur hefði leikið grátt. Því miður fyrir þá sem hafa þetta sjónarmið á lífið bendir allt til þess að þeir séu í útrýmingarhættu, ekki af völdum kvenmanna, heldur hafa þeir grafið sína eigin gröf einir og óstuddir. Ef til vill hefur blessaður maðurinn ekki verið með sjálfum sér þegar hann skrifaði þennan pistil og satt að segja er það von mín, en alltént held ég að hann ætti bara að halda sig við hestapistlana og leggja frá sér karlrembupennann áður en hann meiðir sig á honum.