Sex hundruð í ólöglegri vinnu

"Byggingaverktakar fá starfsmenn frá Austur-Evrópu án þess að hafa til þess nokkur leyfi og gefa ekki upp launin þeirra. Þeir fjölgar ört sem starfa ólöglega," segir Guðmundur Gunnarsson formaður Rafiðnaðarsambands Íslands. Finnbjörn Hermannsson, formaður Samiðnar, segir sambandið vita af þessari þróun. Hann segir vitað um tilfelli þar sem útlendingar hafi gengið svo langt að stofna fyrirtæki þar sem engar tekjur eru gefnar upp. Hann segir erfitt að átta sig á umfangi vandans en undanfarna þrjá mánuði hefur Samiðn haldið uppi eftirliti í samstarfi við lögreglu og Útlendingastofnun, þar sem reynt er taka á þessu máli. Byggingarverktaki, sem rætt var við, segist þekkja nokkur dæmi þess að útlendingar haldi áfram að vinna, hér á landi, eftir að atvinnuleyfi renna út og gefi tekjur sínar ekki upp. Hann sagðist hafa haft samband við Útlendingastofnun sem hafi vísað á lögregluna, sem vísaði aftur á Útlendingastofnun. Hann sagði að sér virðist vera fá úrræði til að taka á þessu. Verktakinn tók undir með Finnbirni um að dæmi séu þess að menn án atvinnuleyfa stofni sín eigin verktakafyrirtæki, til dæmis um parkett- eða pípulagningar. Þeir yndirbjóði verktaka sem fara að settum reglum. Guðmundur Gunnarsson segir marga þá sem vinna svart vera oftar en ekki af erlendu bergi brotna og vinni þá gjarnan langt undir lágmarkslaunum, fái ekki yfirvinnu greidda né orlof eða veikindafrí. Guðmundur segir að erfitt sé að segja hversu margir stundi vinnu án atvinnuleyfis eða á svörtu kaupi, en óstaðfestar tölur bendi til að þeir séu allt að því 600 í byggingargeiranum á höfuðborgarsvæðinu einu saman.