Kort afrituð og seld á markaði

Kortasvindl er víðfemt vandamál sem þekkist alls staðar í heiminum, segir Jón H. B. Snorrason hjá ríkislögreglustjóra. Hann segir ýmsar aðferðir notaðar til að afrita kort, sem byggist margar á tækniþekkingu. Til dæmis stundi sumir það að vaka yfir hraðbönkum með myndavélum auk þess sem komið er upp tækjum sem líkist hraðbönkum en séu einvörðungu ætluð til að safna upplýsingum af segulrönd og leyninúmerum, sem síðan eru notuð til að búa til nýtt kort. Slík tækni segir Jón að hafi ekki rutt sér til rúms hjá íslenskum afbrotamönnum. Hins vegar hafi íslenskir ferðamenn orðið fyrir barðinu á slíku á ferðalögum. Í Fréttablaðinu í gær var greint frá íslenskum hjónum sem urðu fyrir því að debetkort þeirra voru afrituð í hraðbanka á Ítalíu þar sem þau voru á skíðaferðalagi. Þegar það kom í ljós höfðu um 550 þúsund krónur horfið af reikningum þeirra. Erfitt er fyrir fólk að vara sig á slíkum kortasvikum. Oft á tíðum notar fólk hraðbanka í bestu trú án þess að gera sér grein fyrir að verið sé að afrita kortið. Þórður Jónsson, sviðsstjóri kortaútgáfu Vísa bendir fólki á að í hvert sinn sem hraðbanki hegði sér á einhvern hátt óeðlilega erlendis, eigi fólk hiklaust að hafa samband við kortafyrirtæki sitt og leita ráða. Bergþóra Ketilsdóttir, forstöðumaður upplýsingatækni hjá Mastercard, segir ýmislegt gert til að stöðva misnotkun. Til dæmis sé vöktunarkerfi sem vari við ef kort er notað sama dag á Íslandi og erlendis. Þá sé hringt í fólk þegar óeðlilegar færslur komi í ljós. Þórður, segir upprunalönd hinna fölsuðu korta í mörgum tilfellum vera Bretland, Þýskaland og lönd í suður Evrópu. Hins vegar séu þau síðar notuð í öðrum löndum. Jón H. B. bendir á að breskur maður hafi verið handtekinn hér á landi og dæmdur fyrir að hafa undir höndum fölsuð kort frá Þýskalandi, Svíþjóð og Ástralíu.