Þekkti ekki skilti frá staur

Færeyskur lögþingsmaður var handtekinn fyrir að aka drukkinn á ljósastaur, um síðustu helgi. Torbjörn Jacobsen, yfirgaf bíl sinn eftir áreksturinn og neitaði í fyrstu að opna fyrir lögreglunni þegar hún kom heim til hans. Þegar lögreglan sendi eftir lásasmið, gaf hann sig þó og opnaði. Á heimasíðu sinni eftir helgina sagði þingmaðurinn að það hefði verið óþarfi að kalla á lögregluna, enda hefðu orðið óverulegar skemmdir á umferðarskiltinu sem hann ók á. Mönnum þykir það til marks um að Jacobsen hafi verið búinn að fá sér vel neðan í því að hann skyldi ekki þekkja umferðarskilti frá stórum ljósastaur sem hann felldi svo kyrfilega að rafmagnslínurnar lágu gneistandi á jörðinni.