Fjölmiðlanefnd: Líkist ritskoðun

Tillaga fjölmiðlanefndar um skilyrði fyrir veitingu útvarpsleyfa líkist ritskoðun og mun stangast á við stjórnarskrá verði hún að lögum, segir Hróbjartur Jónatansson lögmaður. Fjölmiðlanefnd kynnti skýrslu sína í fyrradag. Hróbjartur segir að honum lítist við fyrstu sýn nokkuð vel á afrakstur nefndarstarfsins, verkefnið hafi verið umfangsmikið og áreiðanlega ekki auðvelt. Verið sé að takmarka mannréttindi þar sem nú ríki algert frelsi sem verði skert verulega. Þá sé mikilvægt að löggjafinn geri þær takmarkanir með málefnalegum hætti, vitanlega á grundvelli lögmæts markmiðs og gæti meðalhófs. „Mér sýnist það heilt yfir vera í skýrslunni, þó ef frá er talið það skilyrði að hið opinbera þurfi að samþykkja dagskrárstefnu ljósvakamiðla,“ segir Hróbjartur. Skilyrðið sem hér um ræðir er eftirfarandi: Í útvarpslögum segir: „Útvarpsstöðvar skulu gera útvarpsréttarnefnd grein fyrir þeirri dagskrárstefnu sem fyrirhuguð er, svo og fyrirhugaðri grundvallarbreytingu á áður kynntri dagskrá.“ Tillaga fjölmiðlanefndar hljóðar svo: „Nefndin gerir það að tillögu sinni að það verði skilyrði leyfisveitingar til útvarpsrekstrar að dagskrárstefna liggi fyrir og samþykkja þurfi meiriháttar breytingar á henni.“ Magnús Þór Hafsteinsson, varaformaður Frjálslynda flokksins og einn fjölmiðlanefndarmanna, segir á heimasíðu sinni um þetta mál: „Ég get fullyrt með hönd á hjarta að ekkert hefur verið fjær okkur sem starfað höfum í þessari nefnd, en að reyna að koma á einhvers konar takmörkunum á tjáningarfrelsi eða ritskoðun.“ Magnús segir að aðeins sé verið að endurspegla ákvæði í núverandi lögum. Hróbjartur telur tillögu fjölmiðlanefndar hins vegar ganga lengra. Í núverandi lögum sé talað um að gerð sé grein fyrir dagskrárstefnunni en í tillögu nefndarinnar sé talað um samþykki hins opinbera áður en leyfi fæst. Hróbjartur vitnar til þess þegar Hæstiréttur sýknaði Halldór Laxness og fleiri fyrir að hafa gefið Hrafnkötlu út með nútímastafsetningu, með þeim rökum að útgáfa rita sem væri háð leyfi ríkisins jafngilti ritskoðun. Hann telur þetta nálgast það að vera ritskoðun. Fjöldi lögfræðinga tjáði sig um hið fræga fjölmiðlafrumvarp í fyrra en þeir sem fréttastofa hafði samband við í dag áttu flestir eftir að kynna sér innihald skýrslunnar og hafa því ekki enn myndað sér skoðun á tillögunum.