Kópavogur skoðar frían leikskóla

Kópavogsbær skoðar að veita barnafjölskyldum gjaldfrjálsan leikskóla, segir Gunnar I. Birgisson formaður bæjarráðs Kópavogsbæjar. "Við höfum ekki ákveðið hvenær né hverjar áherslunar verða," segir Gunnar. "Það er ljóst að gjaldfrjáls leikskóli kostar mikið en einnig er ljóst að bæjarfélögin greiða nú þegar sjötíu prósent með leikskólunum," segir Gunnar. Ákvörðun hafi verið tekin áður en Reykjavíkurborg lagði fram hugmyndir sínar. Niðurstaða um hvort af verði sé ekki fengin. Jónmundur Guðmarsson bæjarstjóri Seltjarnarnessbæjar segir að ekki hafi verið rætt um gjaldfrjálsan leikskóla þar. Það verði eflaust gert. Garðabær, Hafnarfjörður og Mosfellsbær vilja að viðræður um að lækka leikskólakostnaðinn fari fram við ríkið. Lúðvík Geirsson bæjarstjóri Hafnarfjarðar segir ákvörðun Reykjavíkurborgar að veita gjaldfrjálsan leikskóla eftir rúm fimm ár ýta við viðræðum milli sveitarfélaga og ríkisins. Í Hafnarfirði verði vel fylgst með þróun málanna. "Ég lít svo á að þessi mál verði aldrei kláruð af alvöru nema um það sé samkomulag milli ríkis og sveitarfélaga. Það er forsendan fyrir gjaldfrjálsum leikskóla," segir Lúðvík. Ragnheiður Ríkarðsdóttir bæjarstjóri Mosfellsbæjar segir ákvörðun Reykjavíkurborgar óheppilega: "Ég tel að samningsstaða sveitarfélga við ríkið hafi veikst við útspil Reykjavíkurborgar." Ákvörðun bæjaryfirvalda bíði betri tíma. Ásdís Halla Bragadóttir bæjarstjóri Garðabæjar segir kosningaloforð sem meirihlutinn hafi gefið fyrir síðust kosningar verða uppfyllt áður en ný loforð séu gefin. "Okkur finnst ekki sanngjarnt gagnvart bæjarbúum að lofa einhverju hér og nú sem gerist í óráðinni framtíð þegar enginn veit hver verður við völd," segir Ásdís. Ásdís segir alla flokka á Alþingi hafa rætt hve mikilvægt sé að lækka leikskólakostnaðinn. Það hafi Ríkisstjórnarflokkarnir einnig gert en óformlega: "Mér finnst mjög mikilvægt að sveitarfélögin hagi sér ekki með þeim hætti að þau grafi undan samningstöðu sveitarfélaganna."