Strætó kaupir strætó

Strætó hefur keypt 30 nýja strætisvagna af Irisbus gerð og fékk fyrstu fimm vagnana afhenta í gær. Ásgeir Eiríksson, forstjóri Strætó, reynsluók einum vagnanna um götur Reykjavíkur í gær og lét vel af. "Þetta er hinn mesti ljúflingur, hinn fínasti bíll," sagði hann að akstrinum loknum. Þetta er mesta endurnýjun strætóflotans síðan 1968 þegar hægri umferðin var innleidd á Íslandi en þá voru líka keyptir 30 nýir vagnar. "Það var af praktískum ástæðum, dyrnar voru röngu megin eftir að umferðinni var snúið við," rifjar Ásgeir upp. Stykkið af nýja strætónum kostar 19 milljónir króna og samanlagt kostar endurnýjun flotans því 570 milljónir. Fjögur fyrirtæki tóku þátt í útboði Strætó og hreppti B&L hnossið en fyrirtækið hefur umboð fyrir Irisbus sem varð til með sameiningu almenningsvagnaframleiðslu Renault og Iveco fyrir sex árum. Nýju vagnarnir rúma 90 farþega og geta 34 setið. Vélin er 245 hestöfl, knúin dísilolíu og sjálfskipting er fjögurra gíra. Þeir eru gulir að lit eins og forverarnir enda gulur einkennislitur Strætó sem heldur úti 75 vögnum. Eru þeir misgamlir en þeir elstu um tvítugt. Ásgeir forstjóri er afar ánægður með nýju vagnana fyrir hönd vagnstjóra og farþega og sér fram á bjarta tíma í almenningssamgöngum á höfuðborgarsvæðinu. "Vagnstjórarnir fá fínan vinnustað og gott umhverfi og farþegar fá bjarta og huggulega vagna til að ferðast í." Strætó fær tíu nýja vagna afhenta í ágúst og aðra tíu í ágúst á næsta ári. Síðustu fimm vagnarnir koma svo á göturnar í ágúst árið 2007. Næsta stóra breyting í þjónustu Strætó verður í júní þegar nýtt leiðarkerfi verður tekið í gagnið.