Farmurinn líklega orsökin

"Rannsókn stendur yfir og á meðan svo er vil ég ekki fara út í getgátur um hvað fór úrskeiðis þegar slysið átti sér stað," segir Claus Thornberg, framkvæmdastjóri Tesma-skipafélagsins, en það félag sá um rekstur og mönnun MS Jökulfells, sem sökk á mánudagskvöldið með þeim afleiðingum að fjórir létust og aðrir tveir til viðbótar eru taldir af. Getgátur hafa verið um að með tilliti til þess að veður og sjólag var ekki með þeim hætti að skipinu stafaði mikil hætta af sé líklegasta ástæðan fyrir sjóslysinu sú að farmur skipsins hafi losnað eða færst til með þeim afleiðingum að það tók skyndilega að halla. Sé það rétt útskýrir það flýti áhafnarmeðlima, sem náðu að senda neyðarkall en gafst enginn tími til að tilgreina hvers konar neyð um væri að ræða áður en þeir flýðu sökkvandi skipið. Frá því hefur verið skýrt að þeir fimm áhafnarmeðlimir sem björguðust um borð í danska varðskipið Vædderen voru sjálfir á þeirri skoðun að farmurinn hefði færst til og valdið slysinu og skýtur sú staðreynd að skipið flutti tæp tvö þúsund tonn af stáli stoðum undir þá kenningu en sú vara er ekki flutt venju samkvæmt í gámum heldur eingöngu bundin saman og liggur sér í lest skipsins. Þeir sérfræðingar sem Fréttablaðið leitaði til voru allir á einu máli um að fari svo þungur farmur, tvö þúsund tonn af stálbitum eða plötum, af stað í flutningaskipi geti þunginn einn og sér nægt til að velta því en ekki er heldur loku fyrir það skotið að stálið beinlínis skeri gat á byrðing skipsins undir sjólínu. Hvort heldur sem er gefst þá skipverjum lítill tími til að komast frá borði og er þegar ljóst að tveir þeirra sem fundust látnir höfðu ekki náð að klæða sig að fullu í flotgalla áður en þeir fóru í sjóinn. Hjá Tesma-skipafélaginu fengust þær upplýsingar að það teymi sem sá um að lesta Jökulfell hefði gríðarlega reynslu enda væru lestuð þar yfir 50 þúsund tonn af stáli í mánuði hverjum. Ekkert hefði verið óvenjulegt við lestun í Jökulfellið áður en skipið hélt af stað til Íslands. albert@frettabladid.is