Stærsta hverfið í Úlfarsárdal

Hátt í 17 þúsund íbúðir verða byggðar í Reykjavík á árunum fram til 2024. Stærstu hverfin verða í Úlfarsárdal, Gufunesi og vestan Elliðaáa. Búið er að deiliskipuleggja fyrsta áfanga í Úlfarsárdal og á að byggja 900 íbúðir eða eitt skólahverfi í fyrsta áfanga. Ágúst Jónsson, skrifstofustjóri á umhverfis- og tæknisviði, segir að gert sé ráð fyrir því að byrja framkvæmdum á þessu ári, "kannski í haust eða vetrarbyrjun og fyrstu lóðirnar verða þá byggingarhæfar á næsta ári," segir hann. Ef svo fer sem horfir munu borgaryfirvöld ráðstafa byggingaréttinum næsta vetur, sennilega helmingnum fyrir áramót og hinum helmingnum fyrir kosningar í maí á næsta ári. Hvað gerist í kosningunum veit enginn, þaðan af síður eftir kosningar. Búast má við að haldið verði áfram með hverfið í Úlfarsárdal úr því að framkvæmdir þar verða hafnar en sjálfstæðismenn hafa lýst yfir að þeir hefðu frekar kosið Geldinganesið. Það er því hugsanlegt að stefnubreyting verði síðar.