Skorinn upp þegar dóp sat fast

Rúmlega tvöhundruð grömm af kókaíni voru fjarlægð með skurðaðgerð úr ungum íslenskum karlmanni á Landspítalanum í gær. Maðurinn var í hættu þar sem fíkniefnin voru föst í maga hans og um margfaldan banaskammt var að ræða. Maðurinn, sem er á þrítugsaldri kom til landsins á sunnudag frá Frankfurt. Grunur lék á að hann væri með fíkniefni meðferðis. Við röntgenmyndatöku kom í ljós að hann var með fullan kvið af aðskotahlutum. Þegar þeir skiluðu sér ekki niður af honum var hann sendur í röntgenmyndatöku aftur og virtist þá sem fíkniefnin væru föst. Hann gekkst því undir uppskurð í gær og voru fjarlægð úr maga hans 60 hylki sem reyndust innihalda rúmlega 200 grömm af kókaíni. Maðurinn er ekki þekktur hjá lögreglunni vegna fíkniefnamála og ekki var talin ástæða til að krefjast gæsluvarðhalds yfir honum. Maðurinn dvelur enn á sjúkrahúsi og mun að sögn lögreglu líklega gera það í nokkra daga til viðbótar. Lögreglan segir mikla hættu samfara svona smyglaðferðum og er skemmst að minnast Vaidasar Jússevissíusar sem lést vegna 140 gramma af amfetamíni sem voru föst í kvið hans. Það er auðvitað augljóst líka að svona mikið magn er margfaldur banaskammtur, leki umbúðirnar.