Sri Chinmoy lyfti 308 kg manni

Hinn 73 ára gamli Shri Chinmoy lyfti rúmlega 300 kílógramma Bandaríkjamanni í síðustu viku. Tilgangurinn með því var að vekja fólk til meðvitundar um offituvandann. Hinn 36 ára gamli David Gregory er einn þeirra 115 milljón manna sem þjást af offitu í heiminum. Hann hlaut í síðastliðinni viku verðlaun samtaka Shri Chinmoy fyrir baráttu sína gegn offitu. Verðlaunin hafa verið veitt frá 1988 og hlotnast þeim sem helgað hafa lífi sínu ákveðnum málstað og veitt öðrum innblástur. Á miðvikudaginn í síðustu viku gerði hinn 73 ára gamli andlegi leiðtogi sér lítið fyrir og lyfti hinum 308 kílógramma þunga Gregory í tilefni verðlaunaafhendingarinnar. Eins og við var að búast þurfti gamli maðurinn á öllum sínum kröftum að halda til að þoka verðlaunahafanum upp á við og þó Gregory hafi ekki beinlínis fokið upp færðist hann úr stað að lokum við mikinn fögnuð viðstaddra. Með uppátækinu vilja þeir Chinmoy og Gregory sýna fram á að ýmislegt sé hægt ef viljinn er fyrir hendi. Með aukinni upplýsingu og stöðugri baráttu sé hægt að sigrast á offitufaraldrinum sem Alþjóðaheilbrigðisstofnunin hefur lýst yfir að verði helsta heilbrigðisvandamál næstu áratuga. Hægt er að horfa á lyftuna með því að smella á hlekkinn hér að neðan.