Biðu í hríðarbyl en fengu ekki mat

Á annan tug manna beið fyrir utan Fjölskylduhjálpina í Eskihlíð í gær í von um að fá úthlutað matvælum fyrir gamlárskvöld. Að sögn eins viðmælenda blaðsins kom ekki í ljós fyrr en klukkan þrjú að það væri lokað. Hann sagði að þá hefðu flestir verið búnir að bíða í klukkutíma í hríðarbyl. Fólk hefði verið mjög svekkt því venjulega úthluti Fjölskylduhjálpin á milli klukkan þrjú og fimm á þriðjudögum en það hafi ekki verið raunin í gær. Fólk hafi ekki vitað af því og sagði maðurinn að það minnsta sem hægt hefði verið að gera hefði verið að setja miða í gluggann um að lokað yrði í dag. Ásgerður Jóna Flosadóttir, formaður Fjölskylduhjálparinnar, sagði að það hefði misfarist að setja miða í gluggann og henni þætti það mjög leitt. Hún sagði að það væri verið að safna matvælum núna og þeim yrði úthlutað næsta þriðjudag milli klukkan þrjú og fimm.