Eldra fólki í auknum mæli sagt upp

Ögmundur Jónasson, formaður BSRB, segir æ algengara að roskið fólk sé rekið úr vinnu skömmu áður en það fer á eftirlaun í nafni hagræðingar. Sterk tengsl eru milli ástands á vinnumarkaði og örorku, samkvæmt nýrri rannsókn sem birt er í Læknablaðinu. Meginástæða þess að öryrkjum fjölgaði mikið á árunum 1996 til 2002 var talin vera breytt örorkumat auk aðstæðna á vinnumarkaði. Ný rannsókn sem átti að að rannsaka vægi hvors þáttar um sig hrekur þetta og sýnir fram á að breyttar aðstæður á vinnumarkaði, einkum aukið atvinnuleysi og aukið álag á vinnustað, veldur mestu um þessa fjölgun. Sterkt tölfræðilegt samband er milli þróunar atvinnuleysis og örorku samkvæmt rannsókninni. Þeir sem búa við skerta færni vegna heilsubrests eru líklegir til að hrökklast fyrr úr vinnu en aðrir þegar kreppir að á vinnumarkaði og sækja þá um örorkubætur. Rannsóknir sýna einnig að heilsufar versnar og dánartíðni eykst í kjölfar tímabila með miklu og langvarandi atvinnuleysi. Ögmundur segir þetta koma heim og saman við fullyrðingar Öryrkjabandalagsins og verkalýðshreyfingarinnar að það sé samhengi á milli atvinnuleysis og nýgengis örorku. Ögmundur Jónasson segir ljóst að fólk reyni að halda vinnu í lengstu lög og stjórnvöldum beri að gera allt sem í þeirra valdi stendur til að halda atvinnuleysi niðri og koma í veg fyrir að það sé viðvarandi eins og ástandið sé núna. Hann segir hörkuna á vinnustöðum meiri en áður og fautar í forstjórastólum komist upp með meira en áður. Þeir sem hafi skerta starffsgetu séu fyrst látnir fjúka. Hann segir að það hefði ekki gerst fyrir 20 árum að fólk sem á 2-3 ár eftir í starfi hafi verið látið fjúka vegna hagræðingar, en slíkt eigi sér í auknum mæli stað nú.