Tjónið nemur einni milljón

Fimmtugur maður var að gefa á garðann þegar gólfið hrundi og maðurinn og um 100 kindur féllu niður um rúmlega einn metra í fjárhúsum við bæinn Víðihlíð við Mývatn á fimmtudaginn. Féð var nýrúið og ruddist að garðanum þegar maðurinn byrjaði að gefa. "Enginn veit hvað gerðist annað en að gólfið hrundi og maðurinn með. Kindurnar fóru á sund innan um spýtnabrakið í kjallaranum. Það var mjög lítill skítur þarna, þetta var aðallega vatn. Það var nýbúið að hreinsa skítinn út og dæla inn vatni svo að skíturinn legðist ekki á gólfið," segir Héðinn Sverrisson, bóndi á Geiteyjarströnd í Mývatnssveit. Maðurinn sem féll niður er um fimmtugt. Hann bjargaði sér upp úr kjallaranum með því að klifra upp garðaenda sem hékk ofan í vatnið en varð fyrir áfall við slysið. Hann varð að fara að næsta bæ til að hringja á hjálp því að GSM-síminn hans virkaði ekki eftir að hafa lent í vatninu. Eiginkona Héðins og þýsk vinnukona á bænum hringdu á hjálp en sjálfur stökk Héðinn strax upp í traktor og braut upp hurðina á kjallaranum. "Það kom strax þónokkur hópur syndandi út," segir Héðinn. Um 20 rollur drápust en heilsufarið á hinum var þokkalegt og eru þær nú komnar í hús á nágrannabæ. "Það er ótrúlegt hvað kindur sem manni fannst vera að gefa upp öndina hresstust þegar þær komust í hita og fengu rétt meðal. Það leið stuttur tími þangað til þær stóðu á fætur og fóru að éta," sagði Héðinn. Maðurinn sem féll niður var ekki búinn að jafna sig til fulls í gær en þó nægilega til þess að fara suður með systur sinni til að sækja bíl sem Héðinn var að kaupa en sú ferð hafði verið skipulögð fyrir löngu. Héðinn og konurnar tvær fengu ammoníaksbruna og voru böðuð af hjúkrunarfræðingi. Um 30 manns var í björgunarliðinu sem kom að fjárhúsunum, þar á meðal félagar í björgunarsveitinni í Mývatnssveit. Tjónið er hátt í eina milljón króna. Héðinn er vel tryggður en segir að sér skiljist að tryggingarnar borgi ekki nema tjón á fatnaði og síma, ekki húsum eða fénaði