Aðeins einn viðurkenndur

Aðeins einn einstaklingur hefur verið viðurkenndur sem flóttamaður hér á landi síðustu ár, þrátt fyrir að fjöldi hælisleitenda hafi aukist verulega. Mannréttindaskrifstofa Íslands, í samvinnu við Rauða kross Íslands, eflir til málþings í Norræna húsinu í dag þar sem meðal annars verða ræddar þær alþjóðlegu reglur sem gilda um hælisleitendur og meðferð mála þeirra. Sérstakri athygli verður beint að flóttamannasamningi Sameinuðu þjóðanna, en samkvæmt honum skuldbinda ríki sig til að veita þeim vernd sem flýja ofsóknir í heimalandi sínu að uppfylltum ákveðnum skilyrðum. Árið 2003 sóttu 80 einstaklingar frá 32 löndum um hæli hér á landi. Guðrún Dögg Guðmundsdóttir, framkvæmdastjóri Mannréttindaskrifstofu Íslands, segir að í seinni tíð hafi aðeins einum flóttamanni verið veitt hæli fyrir utan þá hópa sem hingað hafa komið fyrir tilstilli flóttamannahjálpar Sameinuðu Þjóðanna. Nokkrir umsækjendur hafi fengið dvalarleyfi af mannúðarástæðum, en flestir hafi ekki haft erindi sem erfiði. Hún segist velta því fyrir sér hvort Íselndingar séu í raun að uppfylla skilyrði flóttamannasamnings Sameinuðu Þjóðanna.