Öll starfsemi flutt að Hádegismóum

Stjórn Árvakurs, sem gefur út Morgunblaðið, hefur ákveðið að selja allar eignir félagsins í Kringlunni, þar sem blaðið hefur verið til húsa í tuttugu ár og flytja alla starfssemi að Hádegismóum við Rauðavatn, þar sem ný prentsmiðja blaðsins er risin. Söluverð er rúmir tveir milljarðar og er kaupandi fasteignafélagið Klasi. Klasi byggir jafnframt nýtt hús yfir ritstjórnina við Hádegismóa. Meðal hugmynda um nýtingu eigna blaðsins í Kringlunni er að breyta þeim í blandaða byggð verslunar- skrifstofu- og íbúðarhúsnæðis, eða að sameinaðir Tækniháskóli og Háskólinn í Reykjavík fái afnot af húsnæðinu að hluta eða alveg. Nýtt Morgunblaðshús, sem reyst verður við prentsmiðjuna við Hádegismóa verður 3,900 fermetrar að stærð , eða þúsund fermetrum minna en núverandi húsnæði. Með betri skipulagningu á það þó að rúma jafnmarga starfsmenn og í núverandi húsi. Hallgrímur B. Geirsson framkvæmdastjóri Árvakurs segir að salan muni létta mjög rekstur félagsins og bæta þannig samkeppnisstöðu Morgunblaðsins.