Brautryðjendur í íslenskum fræðum

Baggalútar, sem eru þekktastir fyrir að halda úti heimasíðu með fréttatengdu skemmtiefni og flutning grípandi dægurlaga, hafa gefið út bók með glænýju efni. Fréttamaður Stöðvar 2 hitti einn höfundanna í dag. Móðir hans telur bókina vera brautryðjendaverk í íslenskum fræðaheimi. Bókin, sem ber heitið Sannleikurinn um Ísland, inniheldur fróðleik og frásagnir af íslenskum furðum og fyrirbærum frá öndverðu til vorra daga. Garðar Þorsteinn Guðgeirsson, einn höfundanna, segir að loksins hafi Baggalútur fengið að gefa út bók. Þetta sé draumur að rætast. Hann segir að kvikmynd verði gerð um leið og tekist hafi að fá fé úr „einhverjum sjóðum“. Í bókinni er meðal annars að finna sannleikann um símastvíburana í Æðey, Viðeyjardónann og lesbíuna í Sandey, sem höfundur segja draga upp einstæða og uggvænlega mynd af Íslandi og Íslandssögunni. Garðar segir bókina hafa fengið mjög góða dóma hjá mæðrum þeirra félaga og Kofi Annan, aðalritara Sameinuðu þjóðanna. Sömu sögu sé ekki að segja af dómum umboðsmanns Alþingis og íslenska hestsins, en það verði bara að hafa það. Ekki sé hægt að gera alla ánægða.