Launahækkanir helsti veikleikinn

Stjórn Samtaka atvinnulífsins telur launahækkanir opinberra starfsmanna vera helsta veikleikann í íslenskri efnahagsstjórn á undanförnum árum. Þá þróun verði að stöðva. Í nýrri ályktun frá stjórn Samtaka atvinnulífsins er lýst yfir miklum áhyggjum af verðbólguþróun og gengi krónunnar á næstu misserum. Þar segir að ítrekaðar hækkanir Seðlabankans á stýrivöxtum, ásamt öðrum peningamálaaðgerðum, hafi leitt til 5% hækkunar á gengi krónunnar á aðeins nokkrum dögum. Slíkt jafngildir 15 milljarða tekjulækkun útflutningsgreina á ársgrundvelli. Á sama tíma séu eigi að síður lagðar sértækar álögur á fyrirtæki í útflutningsgreinum og því sé verulega farið að sverfa að fyrirtækjum í alþjóðlegri samkeppni í þeirri stöðu sem nú ríki. Þá gera Samtök atvinnulífsins einnig verulegar athugasemdir við miklar launahækkanir hjá hinu opinbera á undanförnum árum, sem samtökin segja langt umfram það sem almennur vinnumarkaður hafi haft tök á að standa undir. Þetta sé þróun sem verði að telja einn helsta veikleika íslenskrar efnahagsstjórnar og henni verði að linna. Umsvif ríkisins á fasteignamarkaði eru einnig átalin og bent á að starfsemi Íbúðalánasjóðs ýti undir enn frekari aukningu útlána, einkaneyslu og verðbólgu. Staða sjóðsins í samkeppni á íbúðalánamarkaði séu í andstöðu við allar hugmyndir um heilbrigða samkeppni og aðkomu ríkisins að samkeppnisrekstri. Samtök atvinnulífsins telja að aðhald í ríkisfjármálum verði ekki nægjanlegt til þess að draga úr þenslu og verðbólguþrýstingi. Því hvetja samtökin eindregið til þess að markmið fjárlaga náist og helst verði af þeim töluverður afgangur á næstu árum svo að góðum hagvexti þurfi ekki að fylgja eins mikil hækkun vaxta og gengis krónunnar.