Stefni biskupi vegna skipunar

Séra Sigríður Guðmarsdóttir hefur stefnt biskupi Íslands, herra Karli Sigurbjörnssyni, og krefst þess að staðfest verði ólögmæti skipunar sr. Sigurðar Arnarsonar í embætti sendiráðsprests í Lundúnum haustið 2003 þar sem málefnaleg sjónarmið hafi ekki ráðið við mat á hæfni umsækjenda og menntun sín og starfsreynsla hafi verið meiri en þess er embættið hlaut. Brotið hafi verið gegn stjórnsýslulögum og lögum er um embættið gilda, auk þess sem jafnréttislög hafi verið brotin. Biskup Íslands, hr. Karl Sigurbjörnsson, setti tengdason sinn, sr. Sigurð Arnarson, til að gegna embætti sendiráðsprests í Lundúnum frá 1. október 2002 án þess að staðan væri auglýst. Í mars 2003 losnaði embættið. Hinn 5. júní birtist auglýsing á vef Biskupsstofu og þann dag sendi sr. Sigurður inn umsókn. Í byrjun júní tilnefndi biskupinn sr. Jón Bjarman sem formann hæfisnefndar og skyldi niðurstaða hennar vera bindandi, þvert á gildandi reglur. Daginn eftir birtist auglýsing um embættið í Lögbirtingablaðinu og sótti sr. Sigríður um embættið 12. júní. Í byrjun júlí skipaði biskup þrjá í hæfisnefnd og í framhaldinu vék hann sæti vegna vanhæfis. Biskup framlengdi setningu sr. Sigurðar í embætti prests í Lundúnum frá 1. júlí til 1. september 2003. Í september ákvað hann svo að Sigurður og sr. Jón A. Baldvinsson, vígslubiskup og áður prestur í Lundúnum, skyldu skiptast á að messa. Eftir mótmæli féllst hann á að stefnandi messaði einu sinni í Lundúnum. Hinn 18. nóvember voru umsækjendur boðaðir á fund hæfisnefndar og átti að taka ákvörðun nokkrum dögum síðar. Hinn 18. nóvember ákvað nefndin að mæla með sr. Sigurði í embættið. Stefnandi leitaði eftir rökstuðningi og kom í ljós að nefndin hafði klofnað. Jafnréttisnefnd þjóðkirkjunnar komst að þeirri niðurstöðu í vetur að jafnréttisáætlun kirkjunnar hefði verið hunsuð.