Störf Íslendinganna mjög hættuleg

Einkarekin öryggisfyrirtæki, eins og tveir íslenskir lögregluþjónar starfa hjá í Írak, borga himinhá laun en störfin geta verið mjög hættuleg. Lögregluþjónarnir fá aðstoð frá utanríkisráðuneytinu ef á þarf að halda. Lögregluþjónarnir Þórjón Pétursson og Þórir Marinó Sigurðsson eru nú staddir í Írak þar sem þeir starfa fyrir breskt einkafyrirtæki sem sinnir öryggisgæslu. Fjölmörg slík fyrirtæki starfa í Írak, bæði á vegum Bandaríkjahers og eins á vegum einkafyrirtækja sem hafa tekið að sér einhver verkefni í Írak. Launin sem menn fá greidd fyrir öryggisgæslu eru himinhá en störfin eru líka hættuleg. Sem dæmi má nefna að vegakaflinn frá flugvellinum við Bagdad og inn í höfuðborgina er ekki nema nokkrir kílómetrar. Árásir eru hins vegar tíðar á þessum spotta og öryggisgæsla á leiðinni kostar hundruð þúsunda króna. Fréttastofan hefur heimildir fyrir því að þeir Þórjón og Þórir hafi farið í sérstaka þjálfun í Bretlandi, áður en þeir héldu til Íraks. Báðir höfðu þeir fyrir þjálfun hjá sérsveitum. Þórir var í víkingasveit lögreglunnar og Þórjón, sem er fallhlífastökkvari, hefur þjálfað með úrvalssveitum í Bandaríkjunum. Í mars á síðasta ári ráðlagði utanríkisráðuneytið íslenskum ríkisborgurum að ferðast ekki til Íraks, og ef slíkt væri nauðsynlegt að veita þá ráðuneytinu upplýsingar um ferðir sínar. Það gerðu þeir Þórjón og Þórir ekki, enda ber þeim engin skylda til þess. Hjá utanríkisráðuneytinu fékk fréttastofan þær upplýsingar að ef til þess kæmi myndi ráðuneytið að sjálfsögðu veita lögregluþjónunum alla þá aðstoð sem það gæti.