Fókus býður í bíó

Fókus fylgir DV í dag og býður á eðalgrínið Without a Paddle. Einnig segist Hreimur í Landi og sonum hafa fengið nóg af poppstjörnunni, vill ekki selja á sér rassgatið. Freysi, Brynjar Már og Kristján í Ópinu spiluðu jólaspilin yfir bjór. Ruslana fór í hungurverkfall, þrátt fyrir að segja Fókus að hún tæki ekki pólitíska afstöðu ... og margt fleira.Aðdáendur "dúd" mynda kætist - Fókus býður á Without a Paddle Aðdáendur "dúd" mynda, sem mætti líka kalla aulahúmorsmyndir, kætast þessa helgina yfir frumsýningu Without a Paddle. Leikstjóri hennar og höfundur er Steve Brill, sem gerði garðinn frægan með Adam Sandler í nokkrum myndum. Þetta er mynd sem gagnrýnendur hata en fólk með sans fyrir neðanbeltis- og almennum rugludalladjókum fílar. Hún sver sig í ætt við Harold og Kumar ..., Highway Patrol, Eurotrip og aðrar slíkar eðalmyndir sem sumir halda einfaldlega ekki vatni yfir. Myndin skartar þremur ágætisleikurum af yngri kynslóð Hollívúdd. Seth Green, Matthew Lillard og Dax Shepard. Green þekkjum við sem son Dr. Evil í Austin Powers, Lillard úr Scream og sem Shaggy í Scooby-Doo og Shepard úr földu myndavélinni Punk´d. Þetta eru allt hressir strákar en þegar vinur þeirra deyr í upphafi myndar ákveða þeir í jarðarförinni (þar sem ein yngismær hjakkast m.a. á kistunni) að uppfylla gamlan draum hans. Þeir halda upp í skóg að finna ránsfeng bankaræningja sem stökk út úr flugvél og hefur aldrei fundist. Vinirnir lenda auðvitað í algjöru rugli, týna öllu og sjálfum sér með. Vísað er hægri-vinstri í aðrar kvikmyndir, Matrix, Star Wars, Rambó, Indjána Jones, Apocalypse Now, listinn er ansi langur. Deliverance á auðvitað kafla, þeir rekast á Burt Reynolds í gervi einbúa og tvær náttúrustelpur í anda Human Nature. Myndin var ekki tekin upp í Oregon, þar sem hún á að gerast, heldur Nýja-Sjálandi. Þarlendis gefur ríkisstjórnin nefninlega samskonar díl við kvikmyndafyrirtækin og hér, 12 prósent af öllum kostnaði er greiddur til baka. Ekki við hæfi þeirra menningarlegustu en mjög margra þó. Without a Paddle er sýnd í Sambíóunum.Þá er bara að drífa sig að kaupa DV í dag, klippa út bíómiðann og rífa Fókusinn í sig.