Tvær milljónir flýja heimili sín

Tvær milljónir Bandaríkjamanna flýja nú heimili sín í Flórída, Louisiana og Alabama-ríki af ótta við fellibylinn Ivan. Búist er við að Ivan gangi á land þar á morgun.  Neyðarástandi hefur verið lýst yfir í þessum þremur ríkjum; Flórída, Louisiana og Alabama og fólk er hvatt til að yfirgefa heimili sín. Ivan hefur mjög oft breytt um stefnu síðustu dagana og sneiddi til að mynda hjá Kúbu, þvert ofan í spár. Að sama skapi virðist líklegt að Flórídaríki sleppi við mesta veðurhaminn í þetta sinn. Sérfræðingar óttast hins vegar að flóðbylgjur geti valdið miklu tjóni á allri strandlengjunni. Sérstaklega er óttast um borgina New Orleans í Louisiana-ríki sem liggur undir sjávarmáli. Ef allt fer á versta veg gæti tæplega sex metra há flóðbylgja skolast yfir borgina. Um ein og hálf milljón manna býr í New Orleans og nágrenni og hafa yfirvöld hvatt íbúa til að forða sér. Gríðarlegar tafir hafa myndast á vegunum út úr borginni og ljóst að ekki komast allir í burtu. Hver fellibylurinn á fætur öðrum gengur nú yfir Karíbahafið og Mexíkóflóa og enn einn bylurinn, sem fengið hefur nafnið Jeanne, er að myndast við Púertó Ríkó og Jómfrúreyjar. Meðfylgjandi er gervihnattamynd af Ivan.