Takk fyrir Framsóknarkonur

Konur og stjórnmál - Signý Sigurðardóttir, áhugamaður um þjóðfélagmál Það er langt síðan ég hef hlustað á pólitíska ræðu sem hefur valdið mér gæsahúð. Það er langt síðan pólitísk ræða hefur orðið til þess að mig langaði að hlaupa út á götu og hrópa húrra! Það gerðist á miðvikudaginn. Úrdráttur úr ræðu Sigrúnar Magnúsdóttur sem sendur var í loftið í Speglinum í fyrrakvöld var frábær – stórkostlegur og varð til þess að mig langaði að fá að vera með. Mig langaði að hlaupa út á götu og hrópa húrra fyrir ykkur framsóknarkonur – Takk þúsund sinnum! Vitið þið hversu frábært framlag þið hafið fært til jafnréttisbaráttunnar síðustu daga og vikur? Ef ekki, er rétt að þið vitið það – þið hafið fært okkur fram um mörg skref gott ef ekki marga áratugi fram á við. Þið hafið kippt okkur út úr lágværu kjökri örfárra einstaklinga yfir í háværan kröfuharðan hóp sem gefur ekkert eftir. Hóp sem ekki leynir sér að er til alls vís! Allar konur sem láta sig jafnréttismál varða af alvöru hljóta að fagna óumræðilega þessa dagana. Gleðilegast af öllu er sú staðreynd að þessi þétta gagnrýni og samheldni kvenna innan Framsóknarflokksins hefur náð út fyrir raðir hans, meira að segja einhverjar sjálfstæðiskonur virðast fagna. Þannig mátti lesa í grein í Morgunblaðinu að Helga Guðrún Jónasdóttir gagnrýndi orð Dagnýjar Jónsdóttur um "hæfni" einstaklinga og er vonandi að sú fáránlega lokun á jafnréttisumræðunni sé nú kveðin í kútinn í eitt skipti fyrir öll. Konur þurfa ekki að finna verkfærin fyrir karlmennina til að þagga niður í jafnréttisumræðunni þeir eru alveg nægilega duglegir við það án okkar hjálpar. Það er ótrúleg móðgun og lítilsvirðing sem felst í því að konur skuli nú um langa hríð hafa hafið þennan söng um að sá "hæfasti" skuli ráðinn í hvert skipti sem umræðan snýst um ráðningu kvenna en að þær þegi þunnu hljóði í öll þau þúsund skipti þar sem karlmenn fá ráðningu út á það eitt að vera af réttu kyni. Hvers vegna haldið þið að Davíð Oddsson hafi tilnefnt Þorgerði Katrínu Gunnarsdóttur í embætti menntamálaráðherra og Sigríði Önnu Þórðardóttur í embætti umhverfisráðherra í kjölfar síðustu kosninga? Hvers vegna haldið þið að Össur Skarphéðinsson hafi náð því að verða fyrsti þingmaður Reykjavíkurkjördæmis norður í síðustu kosningum? Hvers vegna skyldu fleiri konur en karlar hafa kosið Framsóknarflokkinn í síðustu kosningum? Eru ekki skilaboðin skýr? Við getum breytt ásýnd samfélagsins eins og við viljum! Við getum haft stórkostleg áhrif með því að beita því valdi sem við höfum. Hugsið ykkur bara ef okkur tækist að upplifa þann stórkostlega dag að geta haft fullkomlega sjálfstæða skoðun – óháð kynferði? Hugsið ykkur ef við gætum einn dag leyft okkur að deila og vera ósammála á fullkomlega málefnalegan hátt án þess að kynjabreytan komi þar nokkuð við sögu? Við getum unnið að því að þessi dagur komi – galdurinn er sá að standa saman í baráttunni og styðja hvor aðra í þessari baráttu sem sameinar okkur allar.