Hundur át 380 evrur

Kona nokkur í Þýskalandi hélt að hún hefði verið rænd þegar kom að bíl sínum í dag í borginni Aschaffenburg í vesturhluta landsins. Í bílnum var hundur hennar ælandi og 380 evrur sem voru í bílnum voru horfnar. Konan hélt í fyrstu að hundinum hefði verið byrlað ólyfjan. Síðar kom í ljós að enginn þjófur hafði verið á ferð heldur hafði hundurinn étið peningabunkann. Konan tilkynnti málið til lögreglu og fór síðan með hundinn til dýralæknis sem gaf hundinum lyf og eftir tuttugu mínútur komu sex af 50 evruseðlunum niður úr hundinum en afganginum spýtti hundurinn út úr sér í tætlum, ásamt bankayfirliti sem hann hafði einnig gætt sér á. Að sögn lögreglu tapaði konan engu fé því hægt er að fara með skemmda seðla í banka og skipta þeim, sem konan gerði, en engum sögum fer af því hvernig bankastarfsmönnum þótti að fá þessa máltíð hundsins í hendur.