Máli Khodorkovskýs ekki vísað frá

Dómstóll í Moskvu hafnaði því í dag að vísa frá máli sem höfðað hefur verið gegn Mikhaíl Khodorkovský, einum ríkasta manni Rússlands. Khodorkovský, sem var forstjóri Yukos olíurisans, hefur verið í haldi lögreglu og er ákærður fyrir svik. Lögmenn hans segja málið eiga sér pólitískar rætur. Auk Khodorkovskýs er Platon Lebedev, annar helsti eigandi olíufélagsins, í haldi. Lögmenn þeirra segja að ávirðingar um að þeir hafi á ólöglegan hátt komist yfir hlutabréf í fyrirtæki sem framleiðir áburð séu fyrndar. Tvímenningarnir neita sök en verði þeir sekir fundnir eiga þeir yfir höfði sér allt að tíu ára fangelsi. Fréttaskýrendur telja að ástæðan fyrir þeim föstu tökum sem Khodorkovský og Lebedev eru teknir, á meðan fjöldi annarra kaupsýslumanna sem auðguðust eftir vafasamar einkavæðingar í Rússalandi árið 1990 ganga lausir, sé sú að Pútín Rússlandsforseta stafi pólitísk ógn af Khodorkovský.